ភ្នំពេញ៖ អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានលើកឡើងថា ថ្លៃទំនិញប្រើប្រាស់សំខាន់ៗបច្ចុប្បន្នមានការឡើងថ្លៃប្រមាណពី៤ ទៅ៥% ខណៈក្រសួងបានត្រៀមធ្វើអន្តរាគមន៍ផងដែរនៅពេលដែលទំនិញដែលចាំបាច់សម្រាប់ជីវភាពនេះកើនថ្លៃខ្លាំង។
ថ្លែងក្នុងសន្នីសិទព័ត៌មានរបស់អង្គភាពអ្នកនាំពាក្យរាជរដ្ឋាភិបាលនៅព្រឹកថ្ងៃព្រហស្បតិ៍ ទី២១ ខែកក្កដានេះ លោក ប៉ែន សុវិជាតិ បានលើកឡើងថាក្នុងពេលដែលកំពុងកើនអតិផរណានេះក្រសួងពាណិជ្ជកម្មបានសម្រួលនិងធានាប្រភពនៃទំនិញ និងភាពសម្បូរបែបនៃទំនិញបានមកដល់ទីផ្សារនិងមានរិរន្តរភាព។ លោកបន្ថែមថាប្រសិនជាមានការចាំបាច់ក្រសួងនឹងធ្វើអន្តរាគមន៍បន្ថែមទៀត។
បើតាមលោក ប៉ែន សុវិជាតិ ទំនិញដែលចាំបាច់សម្រាប់ជីវភាពរួមមាន ត្រី សាច់ បន្លែ អង្ករ គ្រឿងទេស និងទំនិញនាំចូលមួយចំនួន។
លោកថា៖ «ខ្ញុំបាទសុំឆ្លៀតឱកាសនេះជម្រាបថា ទំនិញឡើងថ្លៃបន្ដិចមែនតែបើធៀបនឹងប្រទេសដទៃយើងនៅក្នុងលំដាប់មួយដែលអាចធានាបាន។ ហើយសុំជម្រាបថាប្រទេសយើងជាប្រទេសផលិតស្បៀង ដូចសម្ដេចលោកមានប្រសាសន៍អញ្ចឹង! ដូច្នេះក្នុងនាមជាប្រទេសផលិតស្បៀងយើងកុំភ័យថាអត់ស្បៀងហូប»។
លោកបានជំរុញដល់វិស័យឯកជនចូលរួមជាមួយក្រសួងក្នុងការកាត់បន្ថយថ្លៃដើម្បីឱ្យអ្នកប្រើប្រាស់អាចទទួលយកបានទាំងអស់គ្នា។
ក្នុងពេលបើកសន្និបាតបូកសរុបលទ្ធផលការងារ ប្រចាំឆមាសទី១ នៅថ្ងៃទី២០ កក្កដា ទេសាភិបាលធនាគារជាតិកម្ពុជា លោក ជា ចាន់តូ បានឱ្យដឹងថាកម្រិតអតិផរណានៅកម្ពុជាបានកើនខ្ពស់បំផុតរហូតដល់ ៧,២% នៅខែឧសភានេះ ដែលមិនធ្លាប់មានក្នុងរយៈពេល១០ឆ្នាំចុងក្រោយ។
បើតាមលោក ជា ចាន់តូ ការកើនឡើងអតិផរណានេះបណ្ដាលមកពីឥទ្ធិពលនៃការកើនឡើងថ្លៃប្រេងឥន្ធនៈ និងម្ហូបអាហារលើពិភពលោក ដោយសារវិបត្តិសង្គ្រាមអ៊ុយក្រែន និងការដាក់ទណ្ឌកម្មនានាទៅលើប្រទេសរុស្ស៊ី ដោយសារប្រទេសទាំងពីរជាប្រទេសឈានមុខគេលើពិភពលោកក្នុងការនាំចេញវត្ថុធាតុដើមដូចជា ប្រេងឥន្ធនៈ ឧស្ម័ន ជី និងផលិតផលកសិកម្ម៕
